05.09.2024

DABARALY MASLAHAT GEÇIRILDI

Baş arhiw müdirliginiň mejlisler zalynda Türkmenistanyň Halk Maslahaty hem-de Gündogaryň beýik akyldary Magtymguly Pyragynyň doglan güniniň 300 ýyllygy mynasybetli «Türkmenistanyň Halk Maslahaty we geljegi nazarlaýan il-ýurt bähbitli çözgütler» hem-de «Magtymguly Pyragy – halkyň ruhy çyragy»  atly dabaraly maslahatlar geçirildi.

Bu maslahatlarda türkmen halkynyň durmuşynda möhüm syýasy waka bolan halk häkimiýetiniň ýokary wekilçilikli edarasy - Türkmenistanyň Halk Maslahatynyň döreýşi we onuň taryhy ähmiýeti barada söhbet edildi. «Pähim-paýhas ummany Magtymguly Pyragy» ýylynda, Mukaddes Garaşsyzlygymyzyň 33 ýyllyk baýramynyň barha golaýlaýan günlerinde, onuň öňüsyrasynda geçiriljek Türkmenistanyň Halk Maslahatynyň nobatdaky mejlisiniň guramaçylygyna taýýarlyk işleri ýurdumyzyň ähli ýerlerinde giňden ýaýbaňlandyrylýandygy we Halk Maslahatynyň alyp barýan işiniň syýasy-jemgyýetçilik ähmiýeti barada çykyş edenler belläp geçdiler. 

Şeýle-de Gündogaryň beýik akyldary Magtymguly Pyragynyň doglan güniniň 300 ýyllygy mynasybetli toý dabaralarynyň giňden ýaýbaňlandyrlan günlerinde, Köpetdagyň gerşinde akyldaryň beýik heýkeliniň bina edilip, «Magtymguly Pyragy» medeni seýilgähiniň açylyp ulanmaga berilmegi türkmen halkyny juda buýsandyrandygy babatda aýdyp geçildi. 

Dabaraly maslahata gatnaşyjylar Magtymguly atamyzyň paýhasyny dünýä ýaýan Gahryman Arkadagymyza, Arkadagly Gahryman Serdarymyza köp sagbolsunlary aýtdylar.